Daah-furka Shirweynaha Urur Siyaasadeed Towfiiq: Bilow Cusub oo Siyaasadeed

Muqdisho, 19-ka Maarso – Magaalada Muqdisho ayaa lagu wadaa in maalinta berri la qabto Shirweynihii ugu horreeyay ee daah-furka Ururka Siyaasadeed Towfiiq (UST), kaas oo loo arko talaabo taariikhi ah oo dhanka siyaasadda Soomaaliya ah.

Shirweynahan ayaa lagu saleeyay aragtida ah in la dhiso urur siyaasadeed adag oo ka shaqeeya midnimada, hufnaanta, iyo caddaaladda bulshada Soomaaliyeed. Ujeeddada ugu weyn waa in Towfiiq noqdo madal lagu mideeyo fikradaha iyo himilooyinka shacabka, si loogu diyaargaroobo door muhiim ah oo siyaasadeed.

Qabanqaabada iyo Hagaajinta

Cabdirisaaq Cumar Shiikh Cabdiwaxid, Xoghayaha Guud ee Guddiga Qabanqaabada, ayaa xaqiijiyay in shirkan si heer sare ah loo diyaariyay. Wuxuu carrabka ku adkeeyay in Towfiiq ka go’an tahay:

• Dib u habeynta siyaasadda dalka si loo helo dowlad sharciyad iyo isla-xisaabtan ku dhisan.
• Dhisidda nidaam maamul daahfuran oo ku saleysan hufnaan iyo cadaalad.
• Xoojinta midnimada bulshada, si looga gudbo kala qaybsanaanta qabiilka iyo siyaasadda gaarka ah.

Ahmiyadda Shirweynaha

Shirweynahan daah-furka ah wuxuu ka dhigan yahay:

• Go’aan cad oo shacabka Soomaaliyeed ka muujiyeen rabitaanka isbeddel dhab ah.
• Soo bandhigidda ajandaha siyaasadeed ee Towfiiq oo xoogga saaraya horumarinta dhaqaalaha, adeegyada bulshada, iyo sugidda amniga qaranka.
• Talaabada ugu horreysa ee dhismaha hay’ad siyaasadeed rasmi ah oo ku biiri karta tartanka siyaasadeed ee dalka.

Aragti Mustaqbal

Ururka Siyaasadeed Towfiiq waxaa loogu talagalay inuu noqdo gole mideeya bulshada Soomaaliyeed – gaar ahaan dhalinyarada, haweenka, iyo qurba-joogta – si ay door muuqda uga qaataan hoggaaminta mustaqbalka.

Daah-furka 19-ka Maarso ayaa loo arkaa inuu yahay bilowga safar siyaasadeed oo horseedi kara isbeddel waara iyo halgan cusub oo dhanka dowlad-dhisidda ah.

Xisbiga Towfiiq oo Magacaabay Wakiilkiisa Rasmiga ah ee Koonfur Galbeed

Muqdisho, Soomaaliya – Xisbiga Towfiiq ayaa maanta si rasmi ah u magacaabay Mudane Ibraahim Maxamad Aamin inuu noqdo Wakiilka Rasmiga ah ee Xisbiga ee Maamulka Koonfur Galbeed. Magacaabistan ayaa qeyb ka ah dadaallada socda ee lagu ballaarinayo saameynta iyo howlaha siyaasadeed ee xisbiga guud ahaan dalka Soomaaliya.

Go’aankan ayaa yimid kadib wadatashiyo iyo qiimeyn qoto dheer oo uu sameeyay hoggaanka xisbiga, iyadoo lagu saleeyay kalsooni buuxda, aqoon, khibrad iyo karti hoggaamineed oo uu leeyahay Mudane Ibraahim.

Hoggaanka Xisbiga Towfiiq ayaa ku ammaanay Mudane Ibraahim inuu yahay shaqsi ku habboon xilkan, isla markaana uu door muuqda ka qaadan doono:

• Horumarinta siyaasadda deegaanka,
• Mideynta shacabka Koonfur Galbeed, iyo
• Xoojinta xiriirka bulshada iyo xisbiga.

“Xisbiga Towfiiq wuxuu aaminsan yahay in magacaabistan cusub ay horseedi doonto mideyn iyo xoojinta codka shacabka Koonfur Galbeed, iyadoo Mudane Ibraahim uu noqon doono xubin muhiim ah oo ka shaqeeya hirgelinta barnaamij siyaasadeedka xisbiga ee ku dhisan cadaalad, horumar iyo nabad waarta,” ayaa lagu yiri qoraal kasoo baxay Hoggaanka Xisbiga.

Ballanqaadka Xisbiga Towfiiq

Xisbiga Towfiiq ayaa mar kale ku celiyey ballanqaadkiisa ah:

• In la mideeyo shacabka Soomaaliyeed si loo helo dowlad adag oo loo dhan yahay.
• In lagu dadaalo horumarinta maamul wanaagga iyo isla xisaabtanka.
• In la dhiso mustaqbal siyaasadeed oo shacabka Koonfur Galbeed iyo guud ahaan Soomaaliya ay si buuxda uga qeyb galaan.

Doorka Mudane Ibraahim

Mudane Ibraahim Maxamad Aamin, oo xilkan cusub loo magacaabay, ayaa lagu tilmaamay inuu leeyahay waayo-aragnimo ballaaran oo ku saabsan arrimaha bulshada, siyaasadda iyo xiriirka bulshada. Waxaa laga filayaa inuu si degdeg ah u bilaabo kulamo iyo wada-tashiyo ballaaran oo uu la yeesho qeybaha kala duwan ee bulshada Koonfur Galbeed, si loo hubiyo in codka shacabka deegaankaas si wanaagsan looga dhex maqlo siyaasadda qaranka.

Hoggaanka Xisbiga Towfiiq ayaa u rajeeyay Mudane Ibraahim guul iyo hufnaan howlaha culus ee loo igmaday, iyagoo tilmaamay in magacaabistan ay ka tarjumayso himilada xisbiga ee ah in dalka laga dhiso nidaam siyaasadeed casri ah oo loo dhan yahay.

Xog Dheeraad ah

Magacaabistan waxay ku soo beegmaysaa iyadoo Xisbiga Towfiiq uu ku howlan yahay dhismaha iyo xoojinta laamaha gobollada, taas oo qeyb ka ah istiraatiijiyadda guud ee xisbiga si Soomaaliya looga hirgeliyo nidaam siyaasadeed waara oo ka turjuma rabitaanka shacabka.

Guddoomiyaha Xisbiga Towfiiq oo Si Weyn loogu Soo Dhaweeyay Johannesburg, South Africa

Johannesburg, South Africa – Guddoomiyaha Xisbiga Towfiiq, Mudane Dr. Sha Maxamed Shaakir Cali Xasan, ayaa si heer sare ah loogu soo dhaweeyay magaalada Johannesburg ee dalka Koonfur Afrika.

Jaaliyadda Soomaaliyeed ee halkaasi ku nool ayaa si diirran u qaabishay, iyagoo muujiyay farxad iyo kalgacal ay u qabaan booqashada Guddoomiyaha iyo wafdigiisa. Waxay tilmaameen inay muddo dheer sugayeen imaanshihiisa, taas oo ay u arkaan talaabo dhiirrigelin ah oo lagu xoojinayo xiriirka jaaliyadda iyo xisbiga.

Mudane Dr. Shaakir iyo wafdigiisa ayaa uga mahadceliyay jaaliyadda soo dhaweynta ballaaran, iyagoo ku sifeeyay mid muujinaysa taageerada, kalsoonida, iyo dareenka ay bulshada Soomaaliyeed ee Koonfur Afrika u hayaan Xisbiga Towfiiq.

Kadib soo dhaweynta, wafdiga waxaa loo galbiyay hoygii loogu talagalay, halkaas oo ay ku sii degganaan doonaan inta lagu guda jiro booqashadooda rasmiga ah. Inta ay joogaan Johannesburg, Guddoomiyaha iyo wafdigiisu waxay yeelan doonaan kulamo muhiim ah oo ay la qaadan doonaan jaaliyadda Soomaaliyeed, ganacsatada, hay’adaha maxalliga ah iyo daneeyayaasha Koonfur Afrika ee arrimaha Soomaaliya.

Booqashadan rasmiga ah ayaa qeyb ka ah dadaallada Xisbiga Towfiiq ee lagu xoojinayo xiriirka uu la leeyahay qurbojoogta Soomaaliyeed, islamarkaana lagu dhiirrigelinayo doorkooda muhiimka ah ee ku aaddan dib u dhiska iyo horumarinta dalka. Waxa kale oo ay caddeyneysaa sida xisbigu uga go’an tahay dhismaha xiriir siyaasadeed iyo diblomaasiyadeed oo qotodheer oo lala yeesho dalalka iyo bulshada Soomaaliyeed ee dibadda, si loo helo taageero istiraatiiji ah oo lagu horumarinayo mustaqbalka Soomaaliya.

Booqashadii Guddoomiyaha Xisbiga Towfiiq Ee Koonfur Afrika

Guddoomiyaha Xisbiga Towfiiq oo Booqday Safaaradda Soomaaliya iyo Madaxtooyada Koonfur Afrika
Pretoria, Jimco 19 Sebteembar 2025 – Guddoomiyaha Xisbiga Towfiiq ayaa maanta booqday Safaaradda Soomaaliya ee dalka Koonfur Afrika iyo Aqalka Madaxtooyada dalkaas, isagoo ay ku wehliyeen qaar ka mid ah madaxda jaaliyadda Soomaaliyeed ee Koonfur Afrika.

Guddoomiyaha iyo wafdigiisa waxaa Safaaradda kusoo dhaweeyay hoggaanka safaaradda, iyagoo ka wada hadlay sidii loo xoojin lahaa xiriirka u dhexeeya dowladda Soomaaliya iyo jaaliyadda Soomaaliyeed ee Koonfur Afrika, gaar ahaan arrimaha la xiriira ilaalinta xuquuqda iyo daryeelka muwaadiniinta Soomaaliyeed.

Intaa kaddib, wafdigu wuxuu booqday Aqalka Madaxtooyada Koonfur Afrika, halkaas oo si sharaf leh loogu soo dhaweeyay. Waxaa guddoomiyaha ku qaabilay Agaasimaha Madaxtooyada iyo Madaxa Xiriirka Arrimaha Islaamka ee madaxtooyada, waxaana kulanku ku saabsanaa xoojinta iskaashiga labada dal iyo doorka bulshada Soomaaliyeed ee dalkaas ku nool ay ku leeyihiin xiriirka laba geesoodka ah.
Guddoomiyaha Ururka Siyaasadeedka Towfiiq ayaa uga mahadceliyay madaxda safaaradda iyo madaxtooyada soo dhoweynta diirran, isagoo carabka ku adkeeyay in Towfiiq uu mudnaan siinayo horumarinta xiriirka Soomaaliya iyo dalalka Afrika, gaar ahaan Koonfur Afrika oo ay jaaliyad Soomaaliyeed ballaaran ku nool tahay.